2010-10-03

اللقاء السكندرى


 


انا هرغى كتير جدا جدا واللى مش عايز يسمع بالتفصيل الممل بالزوق
هيسمع بالتفصيل الممل اكتر بالعافيه يعنى هتسمعو .... هتسمعو

طبعا انا روحت وكان معايا جوزى حبيبى
شويه انتو بس يا جماعه على جنب
ده شكر خاص لحبيبى وروحى  ميرسيه ليك يا زوجى العزيز عشان
انت مش رضيت تزعلنى وجيت معايا وخلتنى قضيت يوم جميل زيك
برغم اننا كنا رايحين وواخدين قرار اننا مش هنكمل مع الناس لوقت طويل
وكمان انا كنت رايحه عشان الحب الجميل مش تزعل وكان نفسى اشوفها اوى
وبعد اما خططنا انا وهى لقضاء ايام العيد فى الاسكندريه وباظت كالمعتاد
فاقنتعتنى انى اروح اللقاء وانى هنبسط وان مرمر رايحه وبردو كان نفسى اشوفها جدا جدا
ده شكر خاص للحب الجميل حبيبه قلبى ولعليا بنتها ربنا يخليهالها يارب ويحفظها

واجدع سلام خاص والشكر الحار على المجهود اللى بذلتو (دودو ) صاحبه مدونه نبضات قلب ولهان 
فى تنظيم التجمع والتخطيط اليومى بجد كانت صعبانه على جوزى جدا البت صوتها اتنبح يا قلبى  

المهم بقى احنا وصلنا فى الميعاد تقريباً عشان التجمع وهو كان على اروع كورنيش فى الدنيا فى نادى التطبيقين بس بصراحه مدخلناش قولنا نروح نفطر ونضرب اتنين نسكافيه ونعدل الجمجمه ونروح للناس وبعدين شويه ونخلع

انا صريحه جدا جدا على فكرة بس بصراحه اول ما دخلت جوزى اتخلى عنى عادى يعنى وقالى عيشى حياتك واتعرفى وطبعا مش كنت اعرف حد خالص غير رامى صاحب مدونه بابى
الوحيد اللى عرفتو من الصور اللى بينزلهالنا بعد كل لقاء او فسحه بيقوم بيها وبيتمرمط يا قلبى  المهم اتعرفت على الناس كلها وانا قاعد منتظرة الحب الجميل هى ومرمر طبعا انا معرفهومش شكلا خالص الحقيقه بس اعرفهم بالصوت وليست بالضوء
واللى غظنى بقى ان الحب الجميل كان تليفونها الشخصى مغلق وانا نسيت اخد رقم التجمع من ع المدونه عندها المهم اتصل ترد عليا البت اللى بطلع تكلمنى دى وتعصبنى واقفل فى وشها لحد ما الفار بدء يلعب فى عبى قولت اه مرمر جت امبارح والحب الجميل قافله تليفونها يبقى بس مرمر اتخطفت
وبدءت انشر الخبر ان الحب الجميل خطفت مرمر اتارى الهانم نسيت تفتح موبايلها عادى والموصيبه بقى ان مرمر اصلا  فاتها القطر بسبب تغير الساعه وقالت عادى يعنى مش هتفرق ساعه المهم اتمرمتط على ما وصلت الاسكندريه كل ده عشان فارق الساعه

المفيد اتجمعنا كلنا وكل حد بدء يتعرف بالتانى والموصيبه ان محدش يعرف حد خالص غير اسماً فقط وكمان كان تلت تربع الناس مش عارفين حتى الاسماء لانهم بكل بساطه الجروبات التدوينيه منفصله عن بعضها بمعنى ان كل جروب مع بعضه ويعرف بعض كويس جدا والمشكله ان من كل فيلم اغنيه يعنى مش كان فى جروب كامل متجمع مع بعض ويعرف بعض وهوب فجأءه كل الناس بقيت بترغى مع بعض وبتضحك وبتهزر وعايشين حياتهم جدا وكأنهم يعرفو بعض من زمان اوى برغم ان كان من عشر دقايق ميعرفوش بعض خالص واكيد طبعا كل حد كان من جواه مستتقل فلان ودمه تقيل محدش قال بصريح العبارة بس انا عارفه اللى بيدور فى الادمغه

المهم بعد اما قعدنا ولفترة طويله جدا فى النادى ظهرت الحب الجميل وبنتها لولو ومرمر اتعرفنا ببعض وقعدنا ولكن الحب الجميل كانت محتاسه حوسه ام العروسه بالظبط ومش كانت عارفه تقعد والكل بيتصل على الكل واى حد بيكلم اى حد وهيصه ع الاخر ولخبطيطا خالص

المهم هرجنا وشربنا واكلنا وضحكنا وطبعا انبسطنا جدا جدا قررو انهم يروحو بعد كده على قصر المجوهرات تقريبا كانو مخططين لسرقه المجوهرات هه يا دودو انا مش بحب افتن اهو يا دودو

 انا بقى قولت بس هنخلع احنا وخلاص لقيت الناس شاكرين قالو لاء كلنا مع بعض وهنروح هنا وهنا ونعمل مش عارفه ايه  وايه وبصراحه لا انا ولا جوزى لينا فى التحركات الكتير وانا بالاخص بحب اقعد مكانى كده ومش اتحرك مش عارفه ليا السن بقى يا جدعان عجزت بدرى بدرى

المهم خرجنا من النادى كلنا وجتلى دودو القمر قال عايزانى اقلع الشوزة بتاعتى واحطها تحت باطى وامشى حافيه قولتلها لاء الا الشوزة انا عامله حسابى استنى وبدال ما اقلعها وامشى من غيرها غيرتها وامرى لله وبردو مش كنت انا اللى معطلاهم هما اللى كان عايزين يتعطلو انا مالى انا اصلا
كل شويه يقفو يتصورو ودود تصوت لهم احنا مش هنوصل فى يومنا ده  والبونيه صعبت عليا جدا قولت لاء عيب بردو  اخدها تعالى نتصور يا دودو بصى المنظر تحفه وهوب بدءت دودو تتصور فى كل الاماكن مع الاصدقاء العسلات ونسيت احنا كنا رايحين فين اصلا وهنا بقى ظهر الحقد فى الاول وانا ماشيه مع جوزى جه احمد الصباغ وخضنى طبعا ايه ده هو فى حد يمشى ويمسك ايد جوزو  يا نهارى الدنيا حالها اتشقلب  يعنى لو انا ماشيه ماسكه ايد حد غير جوزى هيبقى مش عيب لكن العيب انه جوزى اصلا ماشى يا احمد والهانم بقى الحب الجميل والحقد اللى كان بيبوظ من عنيها هى وقلب القطه واحنا بنتصور انا وجوزى وقعدت تصرخ محدش يصورهم دول متجوزين وعندهم تلاته وانا اللى ..... بلاش بقى اقول قالت ايه هههههههههههههه وقلب القطه ماكنش العشم يا جميل شكرا ليكو على الحقد اللى ظهر فاجئه بس  انتى غلطانه كنتى كابستى على نفس جوزك انتى كمان والله ولا كان هيقول حاجه انتى مش شايفه كنت عامله ايه فى الراجل كابسه على نفسه يا امى طول الوقت هههههههههههههههه لما كان هيطق منى بس بحبك يا كوكو يا قلبى يا ابو عيالى  محدش واخد منها حاجه قلبت رايا وسكينه فى لحظه

وكان قصر المجوهرات بيقفل بدرى وعلى ما اتصورنا كان قفل اصلا والحمد لله

طلعنا بعد كده على كافيه فى بحرى من نفسنا روحنا نتغدى وقعدنا على الكافيه وكل حد طلب اللى هو عايزة وحصل تفكك لمده ساعه تقريبا عشان كان فى مفاجأه وبيحضرو ليها
كان عيد ميلاد حنين القلب  مامه عمر القمر ربنا يخليهولها ويحفظو يارب
والناس قبل عيد الميلاد طلبو اكل جاعو يعنى والحمد لله جلهم الاكل بعد ساعتين تقريبا واكتر وكان نصهم زهق وراح لغى الطلب بتاعو ومشيو لمكان تانى عشان عايزين ياكلو سمك حاضراتهم  .... بالهنا والشفا يا جماعه كان حلو السمك طبعا ماشى ماشى يا احمد يا صباغ انت ومحمد كمال واحمد سو وخالد ورقصنى يا جدع وناس تانيه معاهم كتير كان السمك جميل انا حاسه بالسمك والله وهو بيصرخ من المرمطه فى ايديكو هههههههههه بالف هنا وشفا
اما بقى اللى كانو قاعدين على الكافيه والمطعم اللى لازق في الكافيه طلبو بيتزا واتشردو على ماجت البيتزا يا عينى ومنهم مات من الجوع وضرب كشرى يا حرام وانا بقى كان القهوجى هيضرب على البطاريه بتاعتى بس الحمد لله لحقت نفسى ورجعنا جبناها تانى

اصلى انا موبايلى فصل شحن وبتكلم مع جوزى  ومحمد الترك وهوب اتحشر القهوجى فى النص وادانى بطاريتو واخد بطاريتى تشحن فى موبايلو وطبعا الزهيمر ومشينا وسبناها لكن رجع جوزى ومحمد يجيبوها اصلها بطاريه اصلى وبطاريتو صينى صينى 

 المهم بعد كده روحنا المراجيح كانت جانب المرسى ابو العباس وكل الناس الحمد لله اتمرجحو  بس فيهم كان راكن على جنب معايا كده مع انى كان نفسى اتمرجح معاهم بس بخاف جدا
واثناء بقى المراجيح حصلت الفضايح ماشى انا امينه اهو لحد دلوقتى ومش هقول حاجه بس اما اشوفهم هيعملو ايه
دودو وحنين القلب ومحمد الترك ومصطفى الريان وخالد وحنان الشافعى ومين يا جوجو مين تانى ماشى هشوف انا من الفيديو مين تانى

 وده الفيديو هو ممكن يكون مش واضح بس هفرجكم عليه بردو
اتفرجو بقى

وطبعا فى فيديو تانى وانا وجوزى بنلعب بلياردو بس مش هنزلو لانى اتهزمت كالعاده اصلو حريف وانا مستجده يا جماعه ... الاعتراف بالحق فضيله طبعا مع انى والله بغلبو بس على الكمبيوتر وربنا

المهم قالو هنروح القلعه هنا بقى ناس كتير اوى مشيو لانهم كانو جاين من بعيد جدا وكان خالد همس الاحباب وفاتيما متولين التجمع القاهرى واضطرو يمشو عشان كان معاهم بناويت ومش هينفع يتاخرو بس بجد كان نفسى جدا يكونو معانا فى القلعه

طلعنا على القلعه اللى دخل دخل واللى اتشرد بره وحب يستجم مع الهوى والبحر قعد وانا من الناس اللى اتشردت طبعا قال هسيب البحر حبيبى والهوى عشان ادخل القلعه قال وبعدين انا عارفها انها لبست اصلا ادخلها ليه بقى 

بعد كده الكل عايز يشرب شاى واللى عايز نسكافيه فقالو هيروحو يقعدو على الكورنيش بتاع القلعه  وهنا بقى كانت المشكله الكبرى الكل قعد واترستأ واللى طلب حاجه طلبها

وجه الجرسون قالى الواحد الشاى ب 5 جنيه والقهوة شرحو اما بقى الكانز ب 8 جنيه تقولش احنا سياح اجانب المهم الناس طلبو وهما بصراحه مضايقين
وانا برغم انى مطلبتش حاجه كنت مضايقه بردو مع انى كنت هموت على نسكافيه بس مش رديت قولت هيعملو من ميه البحر ده ولا ايه وكمان مش كان عنده كوبايات بلاستيك

لحد ما جه استاذ هانى ثروت وندهه الجرسون وخلى الشاى بأتنين جنيه بدلا من خمسه ولكن القهوى زى ما هيه وبعد ما قاله انه ظابط فى قسم مش فاكرة الاسم ايه بس المهم عمل تخفيض فى الشاى تقريبا
انا بقى مش كان غايظنى غير الكانز ابو 8 جنيه هو مش بردو الكانز ب 2.5 يبقى ازاى ب 8 ج فجأتنا كده

انا على فكرة اختصرت حاجات كتير جدا جدا بس بجد كان يوم فظيع  ناس جميله اوى ومحترمه اوى
وبعد ما كنت بحبهم من غير ما اشوفهم بقيت بحبهم اكتر وبموت فى شخصيتهم المحترمه بعد ما شوفتهم اكتر

وفى النهايه بشكر كل الناس الجميله السكندرنيه وبقولهم انهم نعمه الرجوله والاخلاق العاليه واننا انبسطنا جدا جدا وكان يوم رائع وجميل بكل الناس اللى كانو موجوده وبشكر احمد الصباغ وقعدته الجميله
 ومحمد كمال  وخالد همس الاحباب  ومحمد التركى اللى مسبناش لحظه وكان مركز اوى مع جوزى وبجد انت حد جميل يا محمد جدا ومحترم جدا واخلاقك عليا اوى واحلى سلام للاسكندرنيه ومحمد جبريل  تخارف زمن وخالد ورقصنى يا جدع  والاستاذ حمدى واحد وخلاص بجد حد محترم اوى وجميل جدا وكريم شاب فقرى عايزة اقولك شخصيا انا مش شوفت حد مؤدب ومنطوى وهادى الاخلاق زى حضرتك يا كريم  واسف على الازعاج تيمو  والفقرى بقى الشربات محمد كمال مبطلش كلام ولا ضحك ماشاء الله عليك ربنا يسعدك ويحفظك يا كيمو واخواته القمرات ربنا يحفظهم يا رب بنوتين بجد قمر ومصطفى الريان واحمد سو وهانى ثروت بجد شخصيات محترمه ومهذبه جدا واحمد الهامى اسماء واحلام فى وجدانى  اللى وصل متاخر وقفشنى وانا بضرب التورته واتفضحت طبعا واحمد الصباغ وضيوفو الجميله وقعدته اللذيذه والاستاذ اسامه شريك مرمر فى المدونات وميرسيه لتعبك معانا فى تصويرنا انا وزوجى مى رحيق الورد وليس فقيرا من يحب شربات واشكرى ماما على الكحك الجميل وقوليلها تسلم ايديها بجد كان رائع وانتى صممتى تبوظيلى الدايت بس مش مهم يولع الدايت ولا تزعلى انتى ابدا يا رورو يا قمر وموجه وسلام للمحشى بتاعها ده كان فى المدونه بس مش فى التجمع وقلب القطه شربات  وجوزها الاستاذ محمد طبعا حد جميل ومحترم زيها جدا جدا وفاتيما العسوله خالص وحنين القلب وابنها عمر اللى اتمرمط معانا وكان كل حد ياخدو لفه شويه واللى مارست عليه امومتى كالعاده لما اشوف بيبى عسوله كده وزهراء  الجميله بجد حد محترم وهادى جدا وطبعا كان نفسى اشوف نصفك التانى لولا بس تتعوض المرة الجايه ان شاء الله وهيثم السيد الفردوس الضائع وشوشو اعترفات قلب حد هادى جدا وجميل جدا بجد وانجى المهم هات من الاخر ومرمر حبيبه قلبى اللى بجد تعبت اوى وجايه من اخر الدنيا عشان تكون معانا وتتعرف علينا كلنا  وحنان الشافعى قمر والله اى نعم قلبتى للراجل القهوى عشان تديلو لبانه بس مش مهم يا قمر احنا كنا مبسوطين بردو  والحب الجميل القمروحبيبه قلبى عليا بنتها ربنا يخليهالها يارب بجد سعيده بيكم جدا جدا
 واللى كان نفسى اوى تيجى ومحصلش نصيب دموع القمر لانها كانت جايه يارب يكون المانع خير ان شاء الله وطبعا لولا صاحبه مدونه صيدلانيه طالعه نازله كنت هتجنن واشوفها والله بس بردو معرفتش تيجى اللى فى القلب فى القلب يا قمروان شاء الله تتعوض المرة الجايه ومش هسيبك الا اما تيجى ان شاء الله
والشوكه الناعمه بجد سعيده جدا جدا انى سمعت صوتك يا قمر وكان نفسى اشوفك اوى

والشكر الخاص دة لمحمد التركى  صاحب مدونه ماضى صنع الحب واحمد الهامى  صاحب مدونه اسماء واحلام فى وجدانى
بجد ما سبوناش خالص لحد ما ربكبنا واحمد فضل معانا لحد ما ركبنا للقاهرة ومحمد التركى بشكرك على الاتصال للاطمئنان علينا واحنا فى المواصلات بجد انتم شخصيه جميله ومحترمه جدا وده  شكر من زوجى ليكو يا جماعه على زوقكم ورجولتكم بجد وهو مبسوط بجد بيكو اوى

كفايه بقى فى ايه تعبت من الكلام الله بقى

يا جماعه انا لو نسيت اذكر اسم حد ياريت مش يزعل منى والنبى العدد كان كبير وانا عندى زهيمر وقتى وفقدان ذاكرة مزمن

ودى بعض الصور بس للشباب فقط وممنوع منعاً باتاً نشر اى صور للبنات والامهات
الفاشلات اللى زيى كده هههههههههههههه




ودى صور لبعض الشباب فى الباص واحنا رايحين تنتشرد على الكافيه














 انا قولت هنزلها زى ما هيه انا بوفى بوعدى يا خالد
وانا وانت ورقصه يا جدع اسم مدونتك كده انا مالى يعنى




هادى والله يا فقرى
ربنا يحفظك ويحميك


هو انا قولت يا كيمو عايزة اصور بروفيلك عشان الفيش والتشبيه ولا حاجه



دى صورللموج اللى حمانا فى اوقات حرجه جدا وعايزة اقول ان تقريبا الناس كلها شربت القهوى والشاى بالموج
واللى نظرة ضعيف يلبس نضارة واللى مش كان موجود ومشى خلاص بقى مش هيحس طعم الموج وشكل جماله والله يا جماعه




ملحوظه : بجد سورى مش هينفع انزل الفيديو عشان البنات واضحه اوى فيه وانا وعدتهم بس لو عرفت اعمل مونتاج وطلع حلو هنزله ان شاء الله

شكرا للجميع على اليوم الجميل ده

gogo!sf
عاشقه الاحزان

59 comments:

Mohamed Gabriel said...

اول كومنت فى اول بوست اتكتب عن احلى لقاء سكندرى عشتة مع مدونى القاهرة الكرام والمحافظات المجاورة ويارب تكونوا انبسطوا وعجبكوا اللقاء وبجد كل حاجة حلوة كانت ف اللقاء دة وزى ما انتى كتبتى كدة بالظبط
تحياتى ليكوا كلكوا والى اللقاء فى لقاء آخر ان شاء الله
:) :)

Anonymous said...

حررررررررررررررررررررررررام عليكى
بقالى 10 ساعات بقرى البوست

ايه يابنتى بتحكى قصة حيااتك
النهاردة نقضيها قريه وبكرا بقا نعلق وعليكى خير لغاية ما استوعب البوووووووووووووووستات اللى فى بعض دى
ههههههههههههههههه

محمد التركى said...
This comment has been removed by a blog administrator.
محمد التركى said...
This comment has been removed by the author.
محمد التركى said...
This comment has been removed by the author.
محمد التركى said...

بس فؤجأت أنى اليوم عدى منه ساعات وانا مش حاسس كان يوم روعه روعه روعه
وكمان اتعرفت على اجمل ناس
وأوعى ياجوجو تنزلى الفديو والنبى
والنبـــــــــــــــــى
لحسن البنات باينه فيه
ههههههههههههههههههه
مش علشان حاجه تانيه لسمح الله

أنتى حره لو نزلتى حاجه

محمد التركى said...

بس بجد أنا بشكرك جدا انك شرفتينا أنتى ونادر أجمل شخصيه بجد ربنا يخليكم لبعض
ومايحرمكوش من بعض ابدآ ابدآ ابـــــــــــــــــــــــــــدآ
ويخللكم أولادكم
ويخليكم ليهم
أنا كنت حاسس بيكى أنتى ونادر ياحرام كنتو هتتجننو عليهم وقلقنين
ونادر لما شاف المراجيح قال ياااااااااااه
يارتنى كنت جبت الأولاد
ربنا يخليكم ليهم
وتشفوهم قد الدنيا

ومتشكرآ جدا على الشكر الكتير قوى اللى مكنش ليه داعى
أنا معملتش حاجه ده أقل أقل من الواجب والله
أ،تو اللى المفروض نشكركم أنكم خلتونا نتعرف عليكم ونتشرف بيكم
أنا من سنيـــــــــــــــن ماعشتش يوم جميل زى ده
وطبعا شكر خاص بقى للبت دودو بجد تعبت جدا
والحب الجميل ربنا يخللها بنت القمر تعبت جدا برضو
والناس كلها كانت زى القمر
بجد نفسى يتكرر اليوم ده تانى وتالت ورابع
وراقصنى ياجدع
ده مهيج الجماهير ياجماعه
ههههههههههههههههه

بجد أنا سعيد جدا جدا جدا ياجوجو أنتى اتعرفت على شخصيه فوق الممتازه زى شخصيت حضرتك
وبجد أسعد وأسعد بمعرفتى لجوزك الراجل المحترم جدا جــــــــــــــدآ
نادر

ربنا يخليكم لبعض
وأكيد تشرفونا تانى وتالت وميه وفى اى وقت أنا أخوكم موجود أنتو بس تعالو وشوفو هنعملو ايه معاكم

أنا سعيد جدا بتعليقى على البوست الجميل ده
وعلى الله اى فديو ينزل هتصل بنادر على طـــــــــــــــــــــــول
والنبى بلاش ياجوجو
ههههههههههههههههههه



تحياتى لقلبك الطيب
وتحيه خاصه جدا من قلبى لأجمل قلب يكمن بداخل راجل اسمه نادر


محمـــــد التركــــــى

جايدا العزيزي said...

عارفه ياقلبى

انا من امبارح مستنيه

بشوق واقول مين اللى هينزل الموضوع الاول
اكيد كان لقاء جميل

حقيقى كان نفسى اكون معاكم كنت عايزة اشوفكم اووووووووى

بس مش بايدى

والله كلكم وحشتونى

وبقيت ااقول يارب يرجعوا بالسلامه ويطمنونى عليهم

بحبكم كلكم

لقاء سعيد داينما واصحاب فى الخير والسعاده

تحياتى

جايدا العزيزي said...

جوجو

ذنبى ايه انى ما قدرتش اجى

نفسى اشوفك ومرمر والحب الجميل

نفسى اتعرف عليكم اوووووووووى

ما تسمعيش كلام محمد التركى

عايزة احس انى كنت معاكم

تحياتى

محمد التركى said...

أيه ده فين نص تعليقى
يالهوى القطه كلته ولا ايه
لا أنا مش هعرف أعيد الكلام تانى
هو بيخرج مره واحده
بس فى حاجه فى التعليقات عندك ياجوجو
مش عارف ايه هيا

بس اقول ايه بقى مش فاكر انا قلت ايه انا لقيت التعليق مش بيتبعت مره واحده قلت اقسمه

المهم انى بجد سعيد جدا بمعرفتى بيكم أنتى ونادر وهكون أسعد لو شرفتونا تانى ولو عملتمو لاقاء تدوينى عندكم أكيد هاجى علشان اشوفكم
وبجد سلميلى جدا جدا جدا
على نادر بجد شخصيه فوق الوصف من الادب والاخلاق والذكاء والمعرفه
مع انه زملكاوى
بس يكرم الزمالك على شان خاطر عيون نادر

تحياتى ليقلبك الجميل
وقلب زوجك الرائع

Anonymous said...

جوجو حبيبى بجد مبسوطه شوفتك وشوفت الناس اللى كنت احب اتعرف عليهم من قرب
ربنا يديم الحب بينك وبين زوجك العزيز والصراحه كتر خيرة انه السبب اننا نشوفك ونتعرف عليكى اشكريه كتير بالنيابه عنى
بس الا قوليلى انتم جاين تحبوا بعض هنا
هههههههههههههههههه
برضوا وراكى وراكى
بهزر طبعا
ربنا يخليكم لبعض يارب
ويخليكى ليا
لو انا فى الفيدو على الله ينزل لو غير كدا نزليه
هههههههههههههههههههه
ولا هخلى التركى يبلغ نادر على طوول انتى حرة بقا
انا ام العروسه ؟؟؟
ماشى يا جوجو
هههههههههههههه
جايدا العزيزى وانا كمان كان نفسى اشوفك بجد ومش تزعلى كتير انى

ان شاء الله تتعوض المرة الجايه
انتى كتبتى البوست دا فى اد ايه بس عشان اعرف
ايه البوست المرمطى دا
ههههههههههه جمع اتمرمط
وانتى كمان حبيبة قلبى

عمرو يسرى said...

كان نفسى اكون معاكوا يلا معلش
المره اللى جايه

gogo!sf said...

محمد التركى
انا لقيت 8 تعليقات متشابهين ومباقتش عارفة انزل اية على العموم هنزلهم كلهم وانت احزف براحتك

الازهرى said...

ممممممممممم
طيب أقول إيه بالذمة

يعنى تقولى كل دول وتنسى الأزهرى
بجد زعاتن كتييييييييييييييييير

آه ما هو أنا كنت هناك بالنية على الأقل
كنت ناوى أعملها مفاجأة وأكون هناك
بس المقلب طلع من نصيبى والظروف عكست والحمد لله
واتصلت بناس من الموجودة سلمت عليهم بس كان بدرى وكان فى ناس كتير ما وصلتش

خيرها فى غيرها

richardCatheart said...

والله مبسوطه جدىىىىىىىىىىىىى
انى شوفتك يا جوجو وعرفتك واتشرفت فيكى انت وجوزك اخونا الفاضل

والله معرفه خير حقيقى يا جوجو
يارب يديم المعروف

والحمد لله انكم اتبسطو معانا وكمان بعد مامشينا كده تبقى ذكرى حلوى فعلا يارب على طول
انا حبيتك علشان انت زينا

عقبال كل مره ياجميل وبسيلى الولاد

لــــ زهــــــراء ــــولا said...

جـــوجــــو

بجد مش عارفه اشكرك على كلامك الجميل عنى وكان نفسى اننا نتكلم اكتر وعن جد ربنا يحفظ لكى زوجك ويبارك لكم فى بعض انسان فاضل
بسم الله ما شاء الله عليكم

ان شاء الله تشوفى لولا عن قريب وعلى فكره الصوت اللى فى المدونه طبعا صوتها وباين اوى اوى عشان طبعا انتى شوفتى شكلى ومش ينفع ده يكون صوتى خالص مالص

فرحانه ان اليوم عجبكم بجد ويارب يجعل كل ايامك فرح وسعاده وخير وهنا
يارب يبعد عنك الحسد والحاسدين ياااااااااااااااااااااااارب

زهراء

عاشقه الرومانسيه said...

لون البوست فظييييييع
هو انا ناقصه عمى ياحاجه؟
هاروح اظلله واقراه وامرى لله
رجعاااااااالك

باحث عن حب said...

hdi ]i ;gi
ايه ده كله

اولا
مبروك انك غيرتى الصوره
انا من احباب التغيير
ثانيا
ايه الصوره الجامده دى
طبعا تشفير للمدونات اخوتنا طبعا
ثالثا
عاوز اعرف انتى كتبتى البوست ده فى كام ساعه
رابعا
انتوا كلكم كده
خليتونى
اتحصر على نفسي علشان مجيتش
خامسا
كان نفسى اتصل
بيكم
بس بصراحه
اتكسفت
خالص
اخر حاجه
ممكن اتصل
ومحدش يعرفنى
سادسا
انا رغم زعلى وحزنى
بس فراحان
انكم اتبسطوا
خاااااااااااااالص
يارب يبارك فى اللى كان السبب فى التجمع وصاحب الفكره
والمشر ف غليها
سابعا
اعملوا حسااااااااااااابى
المره اللى جايه

ثامنا
سلام

عاشقه الرومانسيه said...

والله الاستاذ نادر فعلا كان حاسس بيا قوى
هههههههههههههه
ثم تعالى هنا
مين دى اللى عاشقه الاحزان يابنتى ده انتى مصدر بهجه لينا كلنا طول الوقت
سعيده بجد انى اتعرفت عليكى وعلى الاستاذ نادر
وباذن الله بعد كده وجودكم اساسى فى اى لقاء سكندرى زى خالد وفاتيما بالضببببببط
شرفتونا ونورتونا والله
الحمد لله انكم استمتعتوا

Hamdy said...

نقول كمان من غير زعل واحنا نقدر علي دموع حضرتك ده حتي ميبقاش فيه روح رياضية خالص
وش بيضحك
بجد والله اليوم ده من اجمل ايام حياتي وبحمد ربنا اني شوفت الناس الجميلة دي ويا رب ديما متجمعين في الخير ان شاء الله

شكرا بجد علي الصور علشان انا ليا صورة فيهم :D

بردو مش تنسي تسلميلي علي الاستاذ نادر زوج حضرتك لانو بجد شخصية جميلة

تحياتي لكل الناس الجميلة اللي اتشرفت بيها

حمدي -> واحد وخلاااااااااااااااص

خالد كامل said...

أنا جيت أهو

ثوانى بقى أقرا و ارجع

Tamer Moghazy said...

بجد انا انبسطت قوووي ولو اني جيت في الاخر بسبب الشغل..
بس على الاقل اديني شوفتكوا :)
وكان نفسي اتعرف على كل الناس بس كل مجموعة كانت في مكان..
تتعوض ان شاء الله المرة الجاية :)

صوت من مصر said...

ههههههههههه
اول حد فى التدويت يقولى محمد كمال
كيمو يا بشر
جوزك بجد انسان فوق الوصف وسلامى يوصل ليه

صيدلانيه طالعه نازله said...

مبسوطه قووووووى انى اتعرفت عليكى
و سبحان الله فى وقت قليل جداااا قربنا من بعض
مبسوطه اكتر انى سمعت صوتك و اتكلمت معاكى الحبه الصغيرين دول
بس ان شاء الله الايام جايه و حنتكلم و نتعرف اكتر
الناس اللى انتى قابلتيهم دول شخصيات رائعه
انا شرفت بمقابله كتير منهم و مأسعدنيش الحظ انى اشوف الباقى
و ان شاء الله نتقابل فى لقاءات تانى قريب

الحمد لله ان اليوم عدى كويس و محصلش حاجه تعكر الصفو
يارب دايما و ابدا مبسوطين

فاتيما said...

أولا
انتى يا ستى يا ام عيون بتضحك
دا بقى لقبك و دلعك خلاص

ثانياً
انا مبسوطة جداااااا
انى وقفت اتكلم معاكى شوية
عشان انتى دخلتى قلبى اصلاً من اول ما دخلنا عليكم
الدخلة القاهرية و لقيتك بتبصيلى و تضحكى بعيونك الحلوة دى
و قولت الست دى انا حبيتها خلاص
من غير حتى ما نتكلم

ثالثا
متفقة جدا مع البت دودو
الاحزان ايه؟
انتى يا بنتى عنوان الفرح
انتى ست مصرية صميمة
كلها مرح و ابتسام و مجاملة و ود
و الاحزان دى ملهاش مكان عندك
انا واثقة من غير ما اعرف حاجة
انك قادرة تغلبيها و تعديها
و تضحكى عليها كمان لو هوبت جنبك

رابعا
جوزك شخصية اخلاق جدا
و اتمنى اى لقاء قادم تنورنا انتوا الأتنين سوا ..شكله ابن حلال قوى
ربنا يهدى سركم


خامسا
انتى باين عليكى ام حنينة جداااااااا
و الأم الحنينة تبقى ف نظرى
ست الستات علطول
و كفاية شكلك و انتى بتأكلى عمر
ربنا يخليلك ولادك و يحفظهم من كل شر


سادساً
الصور اللى مع البوست حلوة قوى
و انا مكنتش من ركاب الأتوبيس
و ادينى شوفتكم برضو فيه


سابعا
ميرسى تانى على التفاصيل بتاعة القلعة
لأن كان بودى اكون معاكم
بس انتى عارفة مواعيدنا و كدا


ثامناً
انا عاوزة لما تيجى فرص قادمة
اشوفك دايما لو سمحتى
و خليكى متابعنى عشان اقرب لقاء يوم التبرع بالدم فى اول نوفمبر
ماشى ؟


تاسعاً
اللون البنفسجى تحفة عليكى
و لازم اشيد بذوقك
و شياكتك عشان مش اى حد
يختار درجة بنفسجى حلوة كدا
و اختك من اللايصين ف الحكاية
دى طول عمرى فلما بلاقى حد ذوق كدا
لازم اقوله برافو


بوسات و حضونات كتيييير قوى
و سلامى لزوجك العزيز
و العيال

كل سفرية و انتى طيبة
كل سفرية
و انتى منورانا
ان شاء الله

gogo!sf said...

Mohamed Gabriel

واحلى سلام لاول كومينت على بوست اجمل لقاء سكندرى
وسلام خاص لكل السكندرينيه اللى بجد تعبو معانه اوى عشان يبسطونه

تحياتى ليكى يا محمد يا جبريل وان شاء الله نلتقى فى لقاء اخر عن قريب وعلى خير باذن الله


نورتنى جدا جدا يا قمر

gogo!sf said...

الحب الجميل

ههههههههههههههههههههههه

اوك يا قمر هستناكى بقى بعد بعد بعد بكرة عشان تكونى استوعبتى على مهلك يا قمر مع انى اشوك ان ده وقت كافى لاستيعابك
هههههههههههههههههه

وحياتك ده انا قصه حياتى اقل من كده بمراحل هههههههههههه

ايه يا لولو بقى اقرى وكملى اليوم معانا بعد اما خلعتى يا ندله مننا

براحتك يا قمر طبعا انا بهزر معاكى
وعندك حق هو فعلا طويل جدا وممل جدا جدا ههههههههه انا لو منكو مدخلش اقرى اه والله

نورتينى يا قمر

gogo!sf said...

محمد التركى

وعليكم السلام ورحمه الله وبركاته يا محمد
الله يسلمك يا محمد وبجد انا بشكرك على اهتمامك واتصالك اللى اسعدنا انا ونادر للاطمئنان علينا بجد ميرسيه ليك كتير
وكمان والله هو كمان بيشكر فيك جدا جدا وانت يا محمد شخصيه جميله وهاديه ومحترمه اوى

وبجد والله بعد اما روحنا شكر فى كل الناس ومن قلبه والله مافيش حد فيهم الا وكان رجوله وجدعنه بجد


وبعدين بتهزر ليه انت مش شوفتهم كانو بيصوتلنا لما يلاقونا بنتصرو حقد يا ابنى قال المفروض اللى متجوزين ميتصوروش ولا يمشو جانب بعض خالص

ناس حقودين حقودين ههههههههههههههههه
فعلا والله يا محمد كل الناس جميله ومحترمه جدا جدا سواء البنات او الشباب جدعنه ورجوله بجد

واحنا والله كمان كنا رايحين ومتاكدين اننا مش هنقعد غير نص ساعه بالكتير ونخلع نقضى شهر العسل بعد 10 سنين جواز قصدى 55555 فى عينيكم هههههههههههههههه بهزر والله يا محمد بس بجد انا لازم اتبخر انا والراجل
هههههههههه

بس الحمد لله طلع يوم تحفه ورائع وجميل زى كل الناس اللى كانت موجوده بجد طبعا اليوم فات هوى هو كده الاوقات الحلوة بتعدى فى لحظه
بس بتسيب علامه دايما صعب تتمحى
هو الفيديو فعلا باين فيه البنات بس مش واضح ملامحهم
ومحدش واضح جدا غيرك انت وخالد ومصطفى الريان وواضح كل كلمه قولتها انت ههههههههههههههههه
فا مش تقلق خلاص هنزله بس بعد المونتاج ان شاء الله

ربنا يخليك يا محمد احنا اللى اتشرفنا بيك وبكل الناس الجميله وانبسطنا جدا جدا وربنا يسعدك ويسعد قلبك ان شاء الله

وانت شخصيه تستحق اكتر من كده بكتر
انا ماقلتش حاجه والله يا محمد ربنا يخليك ويبارك فيك

احنا كنا هنتجنن والله وانا كنت هموت عشان كنت عايزة اجيبهم معايا وهو اللى قال لاء هيتبهدلو فى المواصلات معنا وهما اصلا صغيرين

المهم ان اليوم عدى على خير والحمد لله كان يوم جميل زيك يا قمر

نورتنى بجد يا محمد

gogo!sf said...

محمد الترك

هما فعلا تعبو جدا جدا البنت القمر دودو اللى دخلت قلبى على طول وحبيبت قلبى الحب الجميل وطبعا خالد وفاتيما بجد تعبو نفسهم جدا عشان يجمعو الناس فى القاهرة ويجو مع بعض وانا بجد زعلانه انى مجتش معاهم بس ملحوقه ان شاء الله الجيات اكتر

واحنا اللى اتشرفنا بيك يا محمد واتشرفنا بكل الناس الجميله المحترمه ويشرفنا اننا نيجى تانى وتالت ومليون كمان
وباذن الله لنا عوده مرة اخر فى لقاء قريب جدا جدا بس هنا بقى فى القاهرة ان شاء الله
وخلاص مش هنزل الفيديو متعيطش بقى انا هحكى بس اللى كان فيه ايه بالظبط وايه اللى اتقال حلو كده تمام يا معلم هههههههههههههه

نورتنى يا محمد جدا جدا

gogo!sf said...

محمد الترك

الاوقات الحلوة بتعدى فى ثوانى مبتحسش بيها خالص ويارب دايما يجعل كل ايامك حلوة
انا اللى اتشرفت جدا جدا لوجودك واسعدنى تعليقك جدا جدا
ربنا يديم الود يارب

نورتنى يا قمر كتييييييييييير

gogo!sf said...

جايدا العزيزي

ادينى نزلته وبالتفصيل الممل اللى ملنى انا شخصيا من طول البوست ههههههههههه

معلشى اكيد المرة الجايه ان شاء الله نشوف بعض وبعدين انا عارفه والله ان مش بايدك معلشى يا قمر ؤبنا يسعدك يارب ويفرحك باولادك دايما يا جودى يا حبيبتى

انتى لازم تدعيلنا كلنا عشان انتى قلبك كبير وحنون جدا زى صاحبته ربنا مايحرمنا منك ابدا ولا من دعواتك خالص يا حبيبتى

نورتينى جدا يا جودى يا قمر

gogo!sf said...

جايدا العزيزي

مش ذنبك حاجه انا عارفه يا جميل
بس انتى ما ترديش الفضيحه اللى فى الفيديو للناس الحلوة دى
انا هبقى اشرحولك وكمان البنات اللى باينه فى الفيديو مش انا عشان انا اللى كنت بصور والحب الجميل كانت بتتكلم فى التليفون عشان كانت ماشيه ومرمر كانت تقريبا بتضرب ايس كريم او حاجه مش عارف ايه بالظبط

اهو انا فضحتلك شويه بردو

انما محمد التركى فضحتو بجلاجل يا امى هههههههههههه
حرام لما يتجوز حتى هبقى افضحه ههههههههههههههه يمكن حد يعدى ولا حاجه

ان شاء الله هنتعرف عليك ونشوفك وتشوفينا باذن الله

نورتينى يا قمر

gogo!sf said...

محد الترك
متقلقش موجودين فى الحفظ والصون
انا بس لقيت ان اكتر من تعليق شبه بعض قولت انزل واحد منهم لقيتك بتسال على الباقى فنزلتهم كلهم وانت اختار براحتك بقى ههههههههه

احنا اللى اتشرفنا بيك وبمعرفتك الرائعه بجد وان شاء الله هيكون فى لقاء هنا قريب وقريب اوى باذن الله واكيد لازم تكون موجود طبعا
اكل الناس الحلوة دى لازم يكونو موجودين ان شاء الله


اه زمالك قول كده بقى يا ابنى انت اصلا واثق ومتاكده ان محدش زى الزمالك بس خايق تقول الحق لتطحن من فريقك فقولت اللى فى قلبك ولذقتها فى جوزى عشان دخل قلبك بس مش اكتر
الاعتراف بالحق فضيله يا جميل

نورتنى يا محمد

gogo!sf said...

الحب الجميل

يا حبيبتى انا اللى سعيده جدا انى شوفتك وشوفت كل الناس الجميله دى وبجد مبسوطه اوى بعد ماتعرفت عليك وعلى لولو حبيبتى ربنا يخليهالك يا قمر

وصل الشكر يا قمر وهو كمان بيشكرك وبيشكر الجميع على المجهود الجميل اللى بذلتوه عشان تبسطونا

ههههههههههههه حقد يا ساتر اه يا لولو جين نحب بعض عندكم احنا يا بنتى فى اى حته شغال عادى وكمان تغير الجو بيذود الحب بينا جدا عشان كده دايما تلاقينا متنقلين من مكان لاكتر عشان الحب يذيد يا بت اتعلمى بقى مش عارف القولك ايه ياختى هههههههههههههههههه

انا كمان بهزر وربنا يكرمك ويخليك وميرسيه على احل دعوة سمعتها بجد

لاء يابت اطمنى انتى مش فيه انتى وقتها كنتى بتكلم جوزك فى التليفون قبل ما تمشى بس بجد ناس تانيه باينه فيه وفضايح على الاخر مايرضيكيش واظن كده حلو اوى هما اصلا اتفضو بسب الفيديو وعايزة اقولك انى انا وقلب القطه اكتر اتنين هنتفضح لو نزل الفيديو ده وربنا على الكلام اللى قولناه ميردكيش بقى يا لولو

ان شاله يا رب لولو تبقى عروسه انتى تطولى ربنا يديكى العمر والصحه وتشوفيها عروسه زى القمر يوم فراحها ان شاء الله يا حبيبتى

بصراحه هو بوست مرمطه بجد ده انا متعبتش فى اللقاء اد ما تعبت وانا بكتب البوست
على الاقل لما كنت بنسى اسم حد بروح اسئله تانى انما هنا عشرة قهوى ونسكافيه عشان اعصر مخى يا ستى انا اتمرمط بقى ههههههههه

انتى اللى حبيبتى ولولو كمان ربنا يحفظها يارب

نورتينى يا قمر

gogo!sf said...

عمرو يسرى

والله يا عمرو انا سألت عليك اكتر وكنت متوقعه انك هتيجى بس معلشى بقى تتعوض المره الجايه ان شاء الله يا جميل

نورتنى جدا جدا يا عمرو

gogo!sf said...

الازهرى

ولا حاجه وربنا يا ازهرى بذمتك انت انا اقدر انساك ده انت من الشخصيات الجميله اللى كان نفسى اتعرف عليها والله بس معلشى ما فيش نصيب المره دى ان شاء الله تتعوض المرة الجايه

والله خسارة انك مش جيت بس ده عقاب اللى يحاول يعمل مقالب فى حد وهوب تيجى على دماغه هو

بس معلشى يا قمر ربنا يحفظك يا رب ويبارك فيك يا جميل

نورتنى جدا جدا

gogo!sf said...

richardCatheart

يا حبيبتى انا اللى اتشرفت بيكو جدا جدا وبمعرفتكم الجميله انتى والاستاذ محمد زوجك الكريم

انتم بجد ناس جميله جدا ومحترمه جدا وانا بجد حبيبتك بردو جدا عشان انتى نفس كركترى وزى بعض فى الدم
مش احنا دمنا تقيل بردو ههههههههه

اتمنى انى اشوفكم تانى وتالت وعلى طول والله بجد


ربنا يخليكى يا قمر ووصلتها خلاص للاولاد
نورتينى يا قمر جدا

خالد كامل said...

بصراحة كان يوم جامد جداً
انا مبسوط انى شوفتكوا كلكوا

و استنوا التغطية بتاعتى بقى

Elsayed Azab said...

اولا السلام عليكم
ثانيا حرام عليكى عينيا وجعتنى ساعتين بقرأ البوست بتاعى
ثالثا انا معنديش اى فكرة ازاى اتجمعتو بس فكرة جامدة جداوحاجة بجد تحفة

وأخيرا وتحياتى لكى جوجو :)

مي said...

كان يوم جميل بوجودكم نورتونا
بس انتى بجد ماشاء الله عليكى عسوووووووولة خالص
ودمك خفيف وكأن الواحد يعرفك من زمان
سعيدة اوى انى اتعرفت عليكى وعلى زوجك وبجد شخصية محترمة اوى
ربنا يسعدكوا
وتبقوا معانا دايما
ياقمر

gogo!sf said...

لـــولا وزهـــراء

زهراء

انا مهما اقول والله مش كفايه يا اجمل زهرة فى البستان

انا اللى سعيده جدا انى شوفتك وشوفك كل الناس وبشكرك جدا على زوقم ورقتك
انت حد جميل يا زهراء واخلاقه عاليا جدا والله يا قمر ربنا يكرمك ويوفقك ان شاء الله

واتمنى بأذن الله ان اشوف لولا ده شرف ليا طبعا
وبالنسبه للصوت سورى يا لولا مع انه طيعا صوتها رقيق وجميل جدا بس انتى صوتك رقيق وناعم جدا بردو وبجد انتى زى القمر والله يا زهراء وكفايه ان الكل كان بيشكر فيكى اوى وده حقيقه وانتى تستاهلى اكتر من كده كمان يا حبيبتى

وميرسيه ليكى يا قمر على الدعوة الجميله ده وربنا يرزقك بالاحسن والافضل كمان ويسعد قلبك ويفرحك اللهم امين يا زهورة يا قمر يا بطوط قلبى

والنبى يا اختى ادعلنا يبعد عنا البت الحب الجميل والبت دودومهما دول الحاسدين ههههههههههههههه

بهزر طبعا دول زى العسل بس معتقوناش يا اختى هو فى كده بالذمه ههههههههه

ربنا يخليكى يا زهراء ويكرمك يا رب
واتمنى ان اشوفك تانى وتالت ومليون فى كل لقاء

والحمد لله ان اليوم كان جميل اوى زيك وزى كل اهلى الاسكندريه اللى بذلو مجهود بجد عشان يبسطونا

ميرسيه ليكى يا قمر

ونورتينى جدا جدا وانا سعيد موت انك شرفتيى والله يا قمر

نورتى يا زهورة يا حبيبتى

همسات وبحــ الحياه ــر said...

واااااااااء واااء وااااااااء
انا مفروسه وكل ماقرا بوست عن اللقاء اتقطع كان نفسى اجى ورتبت كل حاجةبس اهو قدر ربنا
الحمد لله تتعوض

gogo!sf said...

عاشقه الرومانسيه

اتلككى بقى فى اللون

معلشى يا دودو انا بس كنت عايزة لون جديد وفاتح مش اكتر معلشى بقى سماح المرة دى

gogo!sf said...

محمود(باحث عن حب)

اى خدمه يا ريس عشان تحس بمتعه اليوم كأنك كنت موجود بالظبط
محرمتكش من حاجه اهو عرفت احنا روحنا فين واكلنا وشوبنا ايه خط سيرنا مظبط يا ريس

الله يبارك فيك
بس انا بقى مش بحب التغير كتير تصدق

بس ايه رأيك اتفضلها والله مهى راجعه هى بتاعتنا
طبعا ما هتصدق بنوته زى القمر مافيهاش كلام ههههههه

فى كام ساعه فى ربع ساعه تقريباً مش اكتر بجد

بعد الشر عليك يا حودا من الحصرة تتعوض المرة الجايه ان شاء الله

طب والله لو كنت اتصلت كنا هنبقى مبسوطين جدا وبعدين ناس كتير اوى اتصلت
وانا مش كنت اعرفها ومع ذالك كلمت منا كتير الشوكه الناعمه طبعا تعرفها

وبعدين يا ريس انت غنى عن التعريف والله اقلها كنت هتتصل وتكلم حد انت تعرفه وهو يعرفك بس
مش مهم حصل خير المرة الجايه ان شاء الله تكون معانا ويكون يوم جميل زيك يا قمر

بطل نفسا يا محمود قال مبسوط قال ان اللقاء طالع من عينك باين اهو فى الكومينت ههههههههههه
بهزر طبعا

لازم تكون مبسوط وسعيد عشان احنا انبسطنا لانك حد جميل ومحترم وقلبك طيوب وكبير يا جميل

بأذن الله وبجد عن قريب يا محمود وهتكون اول البشر كلها

نورتنى يا حودا ومش تزعل يا جميل

منورنى دايماً

gogo!sf said...

عاشقه الرومانسيه

اه يا حرام كان كل شويه يقولى صعبانه عليا بس جدعه بجد والله يا دودو مش بجاملك
انت فعلا من الشخصيات اللى يعتمد عليها بجد وكلك رجوله فى وقت اللزوم لانك كلك انوثه اكتر طبعا

وان شاء الله اتمنى يا قمر زالشرف لينا احنا والله يا حبيبتى

الحمد لله فعلا استمتعنا وانبسطنا بوجودكم يا قمر


نورتينى يا دودو يا جميله

gogo!sf said...

wa7ed w5las

اه اتلككو بقى فى الزمالك ده انتم اهلاويه حقوديه بشكل

ارحمو نفسكم شويه عشان كده غلط على صحتكم
وش مطلع لسانه ههههههههههههه

وفعلا والله يا حمد اليوم ده جميل بشكل مش طبيعى
كان غريب بجد

انت يا قمر منور الدنيا كلها بس هو انت هادى كده على طول ولا ده عشان ادامنا احنا بس قول مش تتكسف هههههههههه

بجد انت شخصيه هاديه وجميله يا حمدى وانت فعلا مش واحد وخلاص ابدا
ربنا يحفظك ويوفقك يارب
الله يسلمك يا جميل وهو كمان بيسلم عليك كتير اوى

وربنا يخليك الشرف كان لينا احنا والله

نورتنى جدا جدا يا حمدى

mrmr said...

ااااااااااااااه
ايه مش عجبك الاه بتاعتى
بستريح شويه مش اخد نفسى
كلوووو ده بوست تعبت قوى لغايه لما جبت الاخر
بس سرد هايل ليوم اللقاء طبعا انا متاخره على التعليق لانى جرشت شويه فى اسكندريه لكن انا مبسوطه قوى قوى انى شفتك وشفت الناس الحلوه دى بجد كان يوم جميل وناس اجمل واروع لهم منى كل احترامى وتقديرى ويارب ديما متجمعين فى الخير وقلوبنا كلها حب ولهفه على اللقاء
سلامى ليكى يا قمر واحضان وبوستات لغايه ما اشوفك تانى وسلامى لشخص زوجك الاستاذ نادر لانه فعلا زوج نادر ربنا يسعدكوا ويحافظ عليكوا ويباركلكو فى اولادكوا

gogo!sf said...

مهيج الجماهير

نورت يا ريس خد وقتك وبراحتك على الاخر بس يارب مش تدعى عليا


نورتنى يا خلود

باحث عن حب said...

انتى فين
بقه
انتى كده
غياب
فى اكتر
من بوست
فى مدوناتى
يارب يكون المانع خير

gogo!sf said...

timo

احنا اللى انبسطنا اللى اتعرفنا على شخصيه جميله زى شخصيتك والله يا تيمو

المهم انك جيت وشوفناك وان شاء الله تتعوض المرة الجايه بأذن الله

نورتنى جدا يا مان

gogo!sf said...

صوت من مصر

اى خدمه يا معلم عشان تعرف بس اننا مش حرمينك من ايتها حاجه

ربنا يخليك يا كيمو انت كمان شخصيه جميله ومحترمه جدا جدا والله

نورتنى يا قمر

gogo!sf said...

صيدلانيه طالعه نازله

انا اللى مبسوطه اكتر والله يا علا
انت انسانه حبوبه جدا وشخصيه ظريفه وجميله وفعلا احنا قربنا من بعض فى فترة بسيطه اوى
لانك حد جميل ورقيق وبدون مجامله يا لولا والله
اكيد انشاء الله الجيات اكتر وهنعرف على بعض بالصوت والضوء كمان يا قمر

هما فعلا ناس جميله زيك وشخصياتهم زى العسل وان شاء الله تتعرفى عليهم كلهم فى اقرب فرصه ويكون فى وجودى انا بقولك اهو
الحمد لله ده انا كنت مرعوبه انه يختم معايا واتعكنن بس الحمد لله بدعواتك يا قمر

نورتينى يا لولا وربنا

gogo!sf said...

فاتيما
ماشى يا قمر وانا موافقه جدا
انا اطول ان تيما بحاله تطلق عليا لقب جميل زى ده
ده انا يذيدنى شرف والله يا جميل

يا حبيبتى انا اللى مبسوطه اكتر وانتى اللى لفتى نظرى برقتك ونظراتك اللى كلها حنيه ودفىء
والقلوب عند بعضها يا تيما يا جميله

وانا كمان انضميت ليكم خلاص مش هتهوب جانبى تانى ولو فكرت هقتلها طبعا
واتمنى انها مش يكون ليها مكان خلاص وتبعد عنى محدش بيحب الاحزان يا تيما
لكن احزانى انا احزان كلها حب وعشق فقط لا غير

ربنا يخليكى يا فاتيما ويكرمك ويحفظك يارب
وميرسى لزوقك جدا جدا

يارب يخليكى والله يا بنتى كسفتيى جدا الحمد لله ان ربنا سبحانه وتعالى زرع داخلى الحنيه ومش شرط عشان انا ام بس انا بحمد ربنا وبشكر فضله على نعمته
ربنا يخليكى ويخلى عمر لمامته وريخليلك اولادك يارب

الصور حلوة عشان اصحابها حلوين طبعا وبجد كان نفسى نكون كلنا مع بعض فى كل وقت وفى اى لحظهبس معلش تتعوض باذن الله يا قمر

الحمد لله انكم روحتم بالف سلامه انا عارفه طبعا عشان الناس اللى كانت معاكم وانتم كنتم عايزين تطمنو عليهم بس اهوعرفتى ايه حصل معلشى بقى يا تيما المرة الجايه تتعوض ان شاء الله

انا متبعاكى من غير ما تقولى وان شاء الله ابقى قوليلى على الميعاد وبأذن الله اكون موجوده معاكم

برافو عليكى انتى يا قمر
انا مش عارفه اقولك ايه بس والله ربنا يخليكى
ميرسى لزوقك جدا جدا ومن بعض ما عندكم يا افندم والله

بوستاتوحضونات ليك انتى كمان يا حبيبتى

الله يسلمك وهو كمان بيسلم عليكى يا قمر
والاولاد كمان بيبوسوكى اوى

ميرسى ليكى كتير يا فتيما على التعليق اللى بجد امتعنى بقراءته اوى
واستمعت ايضا بالرد عليه

وكل سفريه وانتى والجميع بالف خير ياقمر

نورتينى جدا جدا يا فاتيما

جوجو

gogo!sf said...

مهيج الجماهير

احنا اللى كنا مبسوطين بيكو كلكم والله واتشرفنا بوجودكم جدا وميرسيه يا خالد على الصور الجميله اللى على الفيس بوك
بجد ميرسى ليك كتير

وفى انتظار تغطيتك يا مان

نورتنى جدا جدا يا خلود باشا

gogo!sf said...

elsayed azab

وعليكم السلام ورحمه الله وبركاته

الف سلامه على عيون حضرتك
تنا اسفه بجد طبعا مش كان قصدى والله

وازى مش عارف ده كان معمول ضجه جامده جدا فى مدونات كتيرة اوى بس اظاهر انك كنت مشغول اوى بقى
معلش تتعوض ان شاء الله والمرة الجايه تكون معانا

ربنا يخليك يا عذب باشا

نورتنى جدا جدا يا جميل

gogo!sf said...

مى

كان يوم جميل بوجودك وبوجود الجميع يا ميويه
انتى اللى زى العسل وهاديه جدا واخلاقك عاليه اوى بجد
ربنا يسعدك ويفرح قلبك دايما
ميرسيه ليكى يا مى انا مش عارفه اشكرك ازاى بس على المجامله الظريفه دى
انتى حد جميل ورقيق جدا والله يا مى
ربنا يكرمك يا قمر ويسعدك انتى كمان ويرزقك بحد يستاهل ويكون جميل زيك يارب

نورتينى كتيييييييييييييير يا ميويه
بجد سعيده بوجودك جدا جدا
نورتينى يا قمر

gogo!sf said...

همسات وبحــ الحياه ــر

يا روحى مش تعيطى يا قمر

مانا كنت عارفه انك جايه وبقيت منتظراكى وسألت عليكى كتير اوى وفى الاخر فقد الامل قولت يبقى مش هتيجى

معلشى المهم انك بخير يا قمر
وان شاء الله تتعوض المره الجايه ونشوفك ونتشرف بوجودك يا جميل

نورتينى جدا جدا يا دموعى

gogo!sf said...

mrmr


لاء ابدا انا اقدر اقول حاجه والله مش اتكلمت خالص خدى وقتك يا مرمر هانم يا قمر
انا سعيده جدا جدا انى شوفتك انتى الحب الجميل والله وربنا يسعدك دايما

مانا عارفه انك كنتى مجرشه هناك بتغيرى جو مانا واخده بالى واخده بالى
بصراحه اسكندريه دى من اجمل الاماكن اللى بعشقها وبعشق بحرها جدا جدا

معلشى هو البوست طويل ورخم اوى انا عارفه بس معلشى بقى سمحينى

ويارب نتجمع دايما فى الخير يا قمر

الله يسلملك يا مرميرو وهو كمان بيسلم عليكى وسعيد بودودك جدا جدا

وبنا يحفظك ويخليكى ويكرمك فى اولادك ويحفظهملك يارب ويسعدك مه زوجك واولادك اللهم امين

نورتينى يا مرمر يا قمر

ليس فقيرا من يحب said...

حبيييييييييييييييييييييييييييييبتى

احلى حد واخف دم واجدع بنوته

بجد انتى انسانه زى العسل وتدخلى القلب

انتى عارفه حسيت انى اعرفك من زمان

ربنا يسعد ايامك ويخليلك العيال

وابوهم العسول انا مش بعاكس على فكرة

سلميلى اوى على العيال وابوهم العسول وبردو مش بعاكس

هههههههههههههههههههههههههه

انا بجد مبسوووووووووطه اوى انى شوفتك

باحبك اووووووووووووووووووووووووووووووى