2013-07-06

ديمقراطيه اخر حاجه


يوم  29/ 6 / 2013 
انا .. واقفه بحضر العشا
نادر .. دخلى المطبخ
حبيبتى اعمل معاكى حاجه
انا .. اه يا حبيبى يا ريت سلطه
هو  .. من عنيه وبوسه اخويه على اورطى
انا  .. نظره استغراب شديد !
دقيقتين فى صمت !!
نادر .. ممكن اقولك حاجه بس مش تزعلى
انا ..  طبعا قول ومش هزعل خالص
نادر .. تتجوزى فولان
انا .. بكل طيبه لاء طبعا
طيب تتجوزى فولان
انا .. بردو لاء
انا .. ليه هو فى حد عايز يتجوز
(عشان احنا فى مناقشتنا دايما بنحط نفسنا فى المواقف )
نادر .. طيب عارفه لو اتجوزتى فلان هكون مطمن عليكى اوى
انا .. يا ابنى انت بتهرج هو انت طلقتنى ولا ايه
هو ..  ربنا يخليكى ليا
هو .. بس بقولك عشان لو جرى لى حاجه ابقى مطمن عليكى وعلى الاولاد
على الاقل هبقى عارف ان الشخص ده مش طمعان فيكى وهيعامل الاولاد كويس جداً
انا .. اتخطفت من حوارة جدا وبطنى وجعتنى وصدعت وسكت
عدى ساعه وهو مش طبيعى
انا .. عايزة اضحكه .. قولتله بس على فكرة انت انانى
هو .. ليه بس
انا .. يعنى انت عايزنى اعيش باقى حياتى فى احباط
مش لاقى غير الشخص ده وتحدده طب سبهالى مفتوحه عشان اختار على راحتى
هو .. ضحكه صفرة .. قلقتنى اكتر.
انا.. على فكرة انا سبتهالك مفتوحه ومش حددت لك حد معين
وقولت لو جرى لى حاجه اتجوز وعيش حياتك براحتك خالص
عشان تعرف الفرق بس يا انانى ..
بناتى .. ماما احنا مش عايزين بابا ينزل المظاهرة
انا.. ليه يا حبايبى انتم كمان
عهد ..  اصل بابا قالى نخلى بالنا من حضرتك ونسمع كلامك ومش نزعلك ابدا
انا .. صدعت زياده وخوفت اكتر ... لا تعليق
انا .. صممت انه مش هينزل ولو مصمم يبقى رجلى على رجلك
هو..  يا بنتى انتى مش هتنزلى
انا ..  ليه يعنى انا هنزل
هو ..  يعنى انت لما تنزلى معايا ونموت احنا الاتنين مين هيربى الاولاد
انا بصيت له بقلق وعيونى كلها دموع ودوخت وقعدت على كرسى الانتريه وتعبت .
واصريت انه مش هينزل 

احب اقول بقى يا زوجى العزيز
عمرى ما هلاقى راجل فى طيبه قلبك وحنيتك ابدا
ومستحيل يكون فى راجل يحل محلك نهائى وربنا يخليك ليا ونكمل حلمنا
اللى حلمنا بيه وحققنا جزء كبير منه

انا بــحبــــــــــــــــــــــك اوى يا نودى يا حــب عمرى

4 comments:

منجي بـــــــــــــاكير said...


نظرا لقيمتك التدوينيّة الرائعة ،سعيا منها لتطوير النقاش و الاستفادة من المدونين العرب ، مدونة الزمن الجميل تدعوك للزيارة و التفاعل !!!

طارق الوزير said...

كلمة بوسه اخويه خا=لتني فهمت الموضوع كله غلط ..كنتي ممكن تفتحي قوس وتكتبي ادام اسمه الزوج او جوزي...

عاطف ابوالسعد said...

لا اقول غير التالق دائما هو حالك يا استاذه

romansy said...

يا هلا يا هلا
يا ترى ايه اخبارك كده يارب دايما تكونى بخير انا عارف ان المدونات خلاص راحت عليها بس جزء من عمرنا