2009-05-24

المصيبه الكبرى


اسفه جدا لانى انهرده هتكلمم عن حادث مثير جدا ومؤلم جدا
الحادث ده يا جماعه ابن وحده جارتنا
ربنا يكون فى عونها ويصبرها يارب
ويرحم ابنها اللهم امين يارب

الموضع ان زوجه قتلت زوجها ابو اولادها

هو شاب عنده (26)سنه

وهى ربنا يجحمها عندها (24) سنه

المهم


خلت الراجل قاعد فى بيته وبيتفرج على التليفزيون وجت من ورا ضهرة


وضربته على راسه بسنجه فطبعا قام من الخبطه بدون مايشعر اكيد وهو


دايخ ولف اداها وشه راحت ضربيته مرة تانيه من ادام بنفس الطريقه


فأنتهى طبعا الشاب المسكين



وبعدين لفيته فى بطانيه ووضعته فى شنطه سفر كبيرة وشليته على تاكسى


وراحت رميته فى مكان فى منطقه الوراق وكانت محضرة معاها فى شنطه


كبريت وجاز عشان تولع فيه عشان تمحى ملامحه نهائيا


اتارى الهانم على علاقه بواحد تانى غير جوزها وعملت كده عشان بتحبه


واتتضح ان الشخص اللى هى على علاقه بيه جوز خالتها


وهما الاتنين اتفقو وعملو كده ليه مش فهمه المفروض انها رافضه تعيش معاه


تطلب الطلاق بكل ادب واحترام ولو رفض وهى مصممه تعمل خلع الموضوع


بقى اسهل من انى افكر عشان انفصل اقتل ومين جوزى اللى بنام فى حضنه


وباكل واشرب معاه وابو اولادى


ازاى يجلها قلب حتى لو بيعذبها لو بيقتلها كل يوم ميت مرة بكلام زى السم


تعمل كده ........ ليه انا مش فهمه


ازاى دى مخلفه منه طيب لما هو وحش اتنيلتى واتجوزتيه ليه طيب كنتى


سبيه وامشى من البيت روحى عند بيت اهلك اهرب مع الزفت اللى تعرفيه


وسيبى الراجل فى حاله ليه تحرقى قلب ام على ابنها وليه تحرمى اطفال من


ابوهم مفكرتيش ان فى يوم ان اولادك هيسألوكى عملتى كده فى بابا ليه شكلك ايه


ادام ولادك لما الناس يقولولهم ان مامتكم قتلت ابوكم عشان حبت راجل تانى


مفكرتيش خالص فى اى حاجه كل اللى همك نفسك وبس ربنا ينتقم منك يا بعيده


المصيبه انها اول ما اتقبض عليها بعد اربع ايام من جريمتها اعترفت بكل حاجه


من اول ماراحت النيابه واعترفت كمان على شريكه


قلبها موجعهاش ياناس ازاى تعمل كده حد يقولى هتجنن والله ومش فهمه ليه


ربنا يصبر اهله يارب


المصيبه الكبيرة لما روحت اعزى ولدته قعدت جنبها ومش قادرة اقول حاجه


الاقى مامتو بتقولى كان زعلان مع مراتو وقاعد عندى هنا ومكنش بيروح بيته خالص


وفى نفس اليوم جت مراته صلحته واخدته على البيت وتانى يوم جت عشان تسأل عليه


عندى قولتلها مش هو روح معاكى امبارح مرجعش تانى


اتاريها قتلته ورميته فى الشارع على الزباله وجايه تسألنى عليه


دى من قسوتها قتلته ادام بنته فبقولها ازاى قالتلى البنت بعد اما جت


هنا قالت ماما ضربت بابا بالسكينه على دماغويا تيته


فى جبروت اكتر من كده دى الاعدام ليها مش كفايه


ربنا ينتقم منها


واللى محزنى اكتر انها بعد اما قتلته تتصل بجوز خالتها اللى هى على علاقه بيه عشان


يجى ويساعدها انها تتخلص من ابو عيالها


حرام والله ........ ربنا يرحمه برحمته


انا لله وانا اليه راجعون


(مصيبه من واقع الحياه)


16 comments:

gogo!sf said...

هو انا بسمع كتير مصايب وجرايم بشعه وبيصعب عليا فعلا بس مش كنت متخيله انها بالاحساس القاتل ده يمكن عشان ده حد قريب منى

بجد ربنا يصبر اهله

ويرحمه ويغفرله

امين يارب العالمين
جوجو

mimi said...

ربنا المنتقم الجبار هياخد بحق المسكين الشاب ... حسبي الله ونعم الوكيل ..

روح شرقيه said...

اعوذ بالله
لا حول ولا قوه الا بالله
فى كده شر
ولا فى بالشكل ده بشر
ربنا يرحمه

حزنتينى يا جوجو.

عن جد حزنت
ربى يعفى عنه

hasona said...

السلام عليكم
لهذه الدرجة القلوب ماتت
وامتلئت الصدور قسوة وجبروت

،،،،
علي رأيك الاعدام مش كفاية عليها وعلي اللي زيها

ربنا يعافينا ويعفوا عنا

،،،،

تصوري ان الامور دي كلها عايزة وقفة
ووقفة تكون قوية
ايه اللي حصل للناس
فين الرقة والحنية وتقوي الله

الله يرحمنا
ويعدي الايام دي علي خير

Darsh Basha said...

لا حول ولاقوة الا بالله
دى واحدة متأكدة ..انا بقرا الموضوع ومش مصدق..على الست المفترية دى ..
الناس والله اتخبلت بجد
بقينا عايشين فى غابة
لما اسمع راجل قتل حد بصدق..فالرجالة عندهم قسوة شوية

اما لما يبقى رمز الحنان والحب يوصل للدرجادى يبقى بجد فى حاجة غلط فى المجتمع
ربنا يستر علينا يارب

وربنا ينتقم منها يارب

romansy said...

اعوذ بالله
على القسوه والجبروت دا
ربنا يرحمه ويصبر اهله دى متخلفه عقليا انها تعمل كده
قتل
ربنا يسترها على كل مسلم
ومسلمه يارب
ويرحم امواتنا جميعا واموت المسلمين

عمرو said...

يا خبر أسود و منيل على الوحشيه و الاٍجرام !!
ده الواحد لما بييجى يدوس على نمله ماشيه على الأرض بيتردد و بيستنى لما النمله تعدى فى أمان و بيستحرم يدوس عليها
ما عمرناش سمعنا عن كلبه قتلت جوزها الكلب و لا حتى أسده قتلت جوزها الأسد و لا حول و لا قوة اٍلا بالله
ربنا يصبر أمه و أهله و يخفف عن بنته مصيبة رؤيتها لهذه الجريمه البشعه اللى ليس لها أى مبرر سوى دناءة نفس الزوجه المجرمه
أنا دماغى لفت و الله

الفراشة الصغيرة said...

ايوووووووووووة

فى ناس كده فى الدنيا

ولسه يا ما هنشوف

حسبنى الله ونعم الوكيل

ماء تشرين said...

يااااااااااااه

هو في ايه بجد

كده كتير والله

بس ارجع واقول الواحد لازم يختار صح

الرسول قلنا اياكم وخضراء الدمن " المراه الجميله في المنبت السوء " بجد لازم الواحد والوحده يختارو صح

ربنا يرحمو ويصبر اهله
وحسبي الله ونعم الوكيل في كل انسان مبيخفش من ربنا

تقبلى مرورى

♥نبع الغرام♥♪≈ said...

السلام عليكم
جوجو حبيبتى
ربنا يبارك فيك على سؤالك عنى
ومتشكره من كل قلبى
وبجد ابكتنى القصه دى
حسبى الله ونعمه الوكيل نفس الأحداث بجد حصلت عندنا زوجه قتلت زوجها بمساعدة عشيقها
ربنا منتقم جبار
وأدعوكى لزيارة بوستى الاخير
اختك انوسه

yoyo said...

يا ساتر يارب
حسبنا الله ونعم الوكيل
فى ناس بالوحشية والقسوة دى
فين ضميرها و قلبها
مش فكرت فى لحظة فى اولادها و نظرة الناس لهم
مش فكرت فى قلب الام اللى كسرته دى ؟؟
فين خوفها من ربنا ؟؟
ياستر يارب
ربنا يصبر اهله يارب و يرحمه برحمته اللهم آآآمين يارب العالمين

حاسة بوجعك اوى والله خصوصا ان الحادثة قريبة منك غير لما نقرا او حتى نسمع عنها

دمتى بالف خير وصحة
تحياتى
يويو

محمد عبدالرحمن شحاته said...

وصلنا الى هذه الدرجه عندما ضاع الايمان وضاعت الاخلاق
واصبحنا بعيدين عن الله
فلا عجب في هذه الجريمه
تقبلي مروري

احساس طفلة محبة للرومانسية بس واقعية said...

المصيبه الكبيرة لما روحت اعزى ولدته قعدت جنبها ومش قادرة اقول حاجه

ينهارى يعنى من واقع حياتك
مش خبر فى جريدة

حسبى الله ونعم الوكيل
حسبى الله ونعم الوكيل
حسبى الله ونعم الوكيل

دا شاب يناس ملحقش يفرح بأولادة
يساتر يارب اية الشر دا
لية النفوس وحشة كدا
وعشان اية يعنى

ربنا يستر
ويصبر قلب اهله
ويقوى اولاده
على اللى امهم سابتهولهم

تقبلى مرورى

Abo 7anf said...

السلام عليكم
قتلته كدا عادى
و بسكينه مش بسم دا اه الجبروت داا

ربنا على القوى

و اكيد ربنا يرحمه
ويغفرله

♥نبع الغرام♥♪≈ said...

السلام عليكم


جوجو


حبيبتى فينك وحشتنى

انتى مش بتفتحى ولا ايه

عامة منتظراكى

وسيبى ليا ميعاد نكلم فيه

اكييييييييد

ربنا ما يحرمنيش منك


سلاموز

زى الهوا said...

هوه فيه كدة ؟؟؟

دى اكيد مختلة عقليا , او عندها هوس

بجد ربنا يرحمنا , انا بقيت خايفة من الزمن بتاعنا دا ومن اللى جاى