2009-04-04

الشات وسنينه



طلاق امراة بسبب الشتشتة

اسمعو اخر الاخبار السارة رغم انكو ممكن تكونو سمعتوها قبل كده

بس مش مهم هتسمعو بردو

المهم ست جميلة جدا ورشيقة جدا وبتحب جوزاها جدا وهو بيعشقها

الراجل عايش مع زوجتة فى منتهى السعاده والحب اللى مش بيسبهم

ابدا وكل يوم يصحى على حب .. يفطر حب .. يتغدى حب.. يا عينى

علية لاء ومش كده وبس ده كمان بيتعشا حب

اية يا ناس فى كده عمرى ما كنت اتخيل انى اسمع عن اتنين بيحبو بعض

بالطريقة دى

المهم

طبعا الراجل عايش حياة سعيده اوى ومبيرفضش طلب لمراتة يعنى لو

طلبت عينة هيدهلها ....الست قالت اما ادلع علية انهرده يمكن يرضى بقى

يشترى لى الكمبيوتر حاكم هو بيغير عليها موووووت وبيخاف علية جدا

وبالفعل حصل المراد واشترى الراجل الكمبيوتر لمراتة ونفذ طلبها برغم

انة كان رافض الفكرة من بابها لاء يعنى لاء راجل بقى اومال اية لية شنة

ورنة فى بيتة وهى معيشاه فى نعيم هو حد لاقى

المهم قالت لجوزها انا عيزة بقى اعمل ايميل عشان اكلم علية كل صحباتى

قال ومالة مكذبش خبر وعمل لها ايميل باسمة نيجى بقى للمفيد

اول حاجة عملتها قعدت تشت لما قالت يابس وكل اما يسألها مين ده تقول

وحده صحبتى اسمها كذا طيب ويسكت

مين ده وحدة صحبتى طيب ويسكت

راجل...راجل

زهق مهو فى شغلة باستمرار يعنى هو شايفها بتكلم مين ولا حتى بتعمل اية

فكبر الجمجمة وسابها مهو متأكد انها بتموت فيه وعمرها ما هتعمل الغلط

نرجع للست الشحرورة بقى ... الله يقطع الشحارير اللى بالمنظر ده

مرة كانت على الشات كالعادة واتعرفت على شخص ما وقعدو يرغو لوقت

متأخر جدا ومن حسن حظها انة فى اليوم ده جوزها اتأخر فى الشغل يعنى

كانت على راحتها خالص

المهم بقو اصدقاء عادى جدا مش عيب وكل يوم يشتو مع بعض بالساعات

قعد الراجل يبعت فى رسايل حب وعشق مهو حبيب بقى ولقت انة فهمها جدا

وقريبين لبعض فى الافكار وبقيت هى كمان تبعت رسايل من اللى قلبك يحبها

لحد ماحبيتة وحبها وبقو مش قادرين يستغنو عن بعض ...حب بقى اومال اية

استمر الموضوع ده ستة اشهر على التوالى لحد ما اخد منها ميعاد غرامى

يا عينى على الغرميات

بس للاسف متقدرش تشوفو فى مكان عام عشان ممكن حد يشوفها وهى متجوزة

خلاص اتفقنا تعالى بيتى قالت ماشى اذا كان كده موافقة بجد ست محافظة جدا

خايفة حد يشوفها فى مكان عام ومش خايفة من ربنا وهى رايحة تخون جوزها

وبالفعل راحت الخائنة لمكان الغرام فى الموعد المتفق علية واول ما وصلت

وبترن جرس الباب لقيت اللى فتح لها الباب

جـــــــــــــــــوزهـــــــــــا

موسيقه تصويرية

ماهو شعورها فى تلك اللحظة

الطبيعى بقى تدلع علية وتقولو ممكن تروحنى عشان مش لاقية تاكسى

والمواصلات زحمة موت

ولا تقولو اية اللى جابك بدرى انهرده يا حبيبى مهى قادرة هنقول اية

نرجع بقى للسبع رجالة ابو الرجالة كلهم عمل ابشع حاجة الواحد مش

ممكن يتوقعها قالها انتى طالق ......لا حوله ولا قوه الا بالله

راجل راجل لاء ومش كده وبس ده سيد الرجالة كمان هو فى كده الله

ينعلة مش يقتلها ولا يولع فيها مش عارفة حاجة غريبة مراتة راحة

لواحد فى شقتة تقريبا كده والله اعلم كانت بتوصلو دليفرى

خلاص بقى خلصت يا خسارة

اتحرم من الدلع

وراحت الشحررة

يستاهل طبعا فى راجل يجيلو قلب يراسل مراته على الشات لمده

سته اشهر لحد ما يوصلها انها تروح شقه واحد غريب هو اينعم

جوزها فى وجهة نظره بس الفكرة غلط ومرفوضة لانه الطبيعى

جدا انه يوسع فكرها اكتر من كده رغم انها ماشاء الله عليها مش

محتاجه ........ ويخليها تحب الفكرة وتكررها

عادى يا جماعه جدا شحرورة

اتجوزت راجل شدييييييييييد

يبقى المجموع يساوى

طلالالالالالالالالاق

قصة من واقع المصايب

الطف بينا يارب

49 comments:

أمل حمدي said...

الجزاء من جنس العمل وقديماً قيل: دقة بدقة ولو زدت لزاد السقا.

المثل دا له حكاية

تقديري لجوجو

assafo anaroze said...

الثاني
و بعدين اقرا
مودتي

assafo anaroze said...

جوجو
بالفعل مثل هذه القصص تقع في مجتمعاتنا بالرغم من ان المراة اخطات في خيانة زوجها في حب ضخص اخر و ليس في ربط صداقات عادية بينها و بين اي كان
بس الراجل كمان اخطا لانه هو اللي اغوى مراته عشان تكون في ذلك الموقف
و الحلانهم يتطلقوا مكانش حل واقعي و منطقي لا ابدا
كان عليهم لما اتحطوا في الموقف ده يحاولوا يناقشوا الاسباب اللي وصلتهم لده و كان ممكن بحوار هادئ ييمكن يلاقوا الحل
مودتي

سمكه واحده said...

تعرفي يا جوجو من اسوء الحاجات اللي حصلت في مصر التكنولوجيا الجديده دي بسبب استخدمنا ليها غلط بجد والله الشات ده هبااااااااااااااب وبيودي في دهيه
انا مش بحترم اي ست متجوزه تشيت علي اساس تسليه لانها غصب عنها ممكن تلاقي صفات مش موجوده في زوجها فبتالي هتقارن وهي بشر مش ملاك ولاحظي ان النت غير العالم الواقعي حيث انه ايه انه يا اختشي بيخليكي تتخيل الشخص اللي ادامك افضل لان ديما الخيال افضل من حقيقه بمراحل وترسمي صوره متكامله
زي المدينه الفاضله كده الاشيك الاوسم الارقي الافضل كل حاجه تاخد المقياس الاعلي
امال والاوحد مش راضي يتجوز ليه عشان ميبقاش حرام عليه
(وش مطلع لسانه)
كمان في ستات مخها صغير جدا وتعرفش تفرق واي ست في الدنيا تحب ديما تسمع مديح وغزل حتي لو جوزها مشبعها لازم تحس بأعجاب من كل اللي حوليها مهو انا مخنا علي ادنا بقي يا جوجو وبيضحك علينا علي طول
بالنسبه للراجل مكنش لف اللفه دي كلها ومكنش جاب اصلاا جهاز مكبيوتر لو هو مش واثق فيها ولما جت لحد عنده في الشقه كان قطع رسها علي رقبتها وسعتها مش هياخد فيها حاجه لانه شرفه بس نقول ايه
راااااااااجل راااااااجل
اللهم ارحمنا وربنا يهدي احوال المسلمين
سيبك انتي ايه رايك في البطاطس ولا فيروز انهي احلي؟
وش بيغمز)

سمكه واحده said...

ياجوجو الدنيا مليانه بلاوي واهو احنا متنيلين ادام الشاشه ممققين عنينه نشوف عجب العجاب في هذا العالم الافتراضي اللي بعد الواحد عن العالم الواقعي بس احلي حاجه حصلت
عالم التدوين
والناس الجميله اللي فيه
سيبك انتي
ونسم علينا الهوي

اسماء واحلام فى وجدانى said...

لا اله الا الله

اسماء واحلام فى وجدانى said...

جوجو

انا فاكر انى كنت سايب تعليق عندك بس

المرة دى مش لاقيه

فانا مش عارف

انتى حذفتيه ولا انا مكتبتوش من الاول

الله اعلم

من غير عنـــوان said...

أولا
هو غلطــــــان لغاية الآخر

بس هي كمان أغلط من الآخر بكتييييييير

يا جماعة الجواز إحترام وثقه
واللي شاكك ....يمشي

بتشك في إيه

وهي بتعمل كده ليه

....
عموما
دي من مصايب هذا العصر

ولا حول ولا قوة إلا بالله

تحياتي لك

عمرو جويلى said...

عارفة يا جوجو للأسف نحن نستعمل التكنولوجيا بطريقة سيئة وكما قال الله تعالى
العين بالعين والسن بالسن والبادى أظلم
صدق الله العظييم
دمت بكل خير

mm said...

لا تعليق بجد التعليق هايكون صعب جدا زى الموقف اللى كانوا فية هما الاتنين بالرغم هما الاتنين كانوا غلطانين بس هيا اللى هاتستحق العقاب صح هوة امجتمع كدة دايما يحاس الست بس حتى ولو كان الراجل مخطى نفس الخطأ تحياتى

عمرو said...

يعنى الزوج كان عارف أن اللى بتعمل معاه شات هى زوجته و هو اللى كان بيدفعها للخيانه ؟؟!!
لو كان اللى فهمته ده صح يبقى هو غلطان أكتر منهاو يستاهل ضرب القباقيب على هذه الفعله اللى مش ولابد
و الزوجه كمان مخطأه و تستحق عن جداره الموقف اللى أتحطت فيه بغبائها و سلوكها الحلزونى ثلاثى الأبعاد
ربنا يهدى الناس كلها للطريق القويم اللى مافيش أحسن منه و الله
تحياتى لك على هذا البوست القيم

نـــــور said...

على فكره

انا شايفاه صح عارفه ليه؟

لانه كده سابها تغلط وهو ماغلطش

ولوكان قتلها مثلا؟!

لا تذر واذره وذراخرى
وغلطها مشمبرر علشان يغلط

ربنا ينتقم ليه
ويعوضه عنها خير

محمد عبدالرحمن شحاته said...

دا الشات ده بيعمل عمايل
طلاق امرأه بسبب الشات انا سمعت خبر أشبه بيه أو مش خبر واحد دا أخبار
لا والمشكله الأخبار متناقضه
يعني
واحده اتجوزت عن طريق الشات
وواحده اطلقت بسبب الشات
ربنا يسترها معانا

romansy said...

الصراحه
الزوج الفاضل غلطان الغلط الاكبر
يعنى هو بيتاخرر فى شغله ومش سائل فيها
اكيد لازم تدوز على حب تانى
وجت الفرصه قدامها
اكيد فكرت كتير
قبل ما تعمل كده وانتظرت كلمه ب واحده من اللى جوزها المحترم بيبعتها رساليل طيب ما يحب مراته شويه ولا علشان
شغله بقى
بس برضه انها غلطانه جايز متكونش ادت لجوزها كل اللى هو عاوزه

momken said...

هو لسه فى حد بيعمل شات؟؟؟؟؟؟

والله كنت فاكره انقرض

بس الراجل صح فى تصرفه انا شايف ان الطلاق حل معقول وكويس

لانه لو قتلها كان صعب يثبت كل القصه دى
كمان هى لسه مرتكبتش جريمه الزنا لاكنها خانه الراجل الطيب

لو كان عمل غير كده هو كمان هيموت ويتعدم وهو معملش اى حاجه

واضح انه شخص راقى وهى متستهلش ده

ربنا يهدى نساء المسلمين


تحياتى

yoyo said...

هو فى رجالة بالشكل دا ؟!!
يعنى هو كان عارف انه وبيكلم مراته على اساس انه حبيب واحد كان وبيتعرف يا سلام على الرجولة وقاعد يتكلم 6 شهور يا قلبه ايه برود الاعصاب و الهدوء دا وكمان فى الاخر هقولها انتى طالق بكل بساطة بعد 6 شهور والله حاجة تنقط بجد

لوفى رجالة بتفكر بالشكل دا تبقى كارثة هو غلط وهى غلطانة طبعا
بس عارفة لما تهيىء للانسان الخطيئة يبقى لازم هيقع فى الغلط
طيب سؤال كدا وعامل يجى على بالى
امال فين الحب بقى؟؟!!!
ايه كان كله كدب ولا ايه ؟!!
هى الاخت الشحرورة مش بتضيع وقت
بصراحة هما الاتنين يستاهلوا اكتر من كدا والله

تحياتى
يويو

الازهرى said...

من الواضح ان الاثنين من نفس النوع
فهى قد رضيت ان تنساق الى ذلك
وهو لم ينتبه انه بدلا من ان يحفظها من الوقوع فى الخطأ ساقها اليه
وان كان الامر مجرد دعابة فمن الجائز ان تعتاد الامر ولا تستطيع الاقلاع عنه

اسماء واحلام فى وجدانى said...

جميل اوى يا جوجو التغير اللى حصل دى

بس ياريت بما انك الكابتن الكبير

تخلينى اقف فى خط الوسط

تبعدينى عن الدفاع والهجوم

لانهم وبصراحة بيتبهدلوه اوى

فى مصر عند حدوث اى خطا

وربنا يجزاكى كل خير

تامر علي said...

الحقيقة في نهي شرعي للرجل من أن يفاجيء امرأته أو أن يتعمد (نصب الكمائن) لها يعني الراجل ده بصراحة دبور زن على خراب عشه ... ممكن كان قطع الشك من الأول ...لكن هو قليل العقل وهي كمان شرحه ... بصراحة المفروض يستمروا مع بعض

تحياتي

Hanan Said said...

والله يا جوجو الموضوع الي بتتكلمي فيه بجد بقى كارثه
الشات ده بجد اكبر كارثه
بيخلي الواحد يتكلم وبنتهى التلقائيه
مافيش حدود
ماهو انت ولا شايفه ولا سامعه
كلام بيتكتب في كلام
ده لو الموضوع مافهوش ويب ومايك يعني
انا عن نفسي بجد بكره الشات
لاني بعد فتره اكتشفت انه وهم
ربنا يرحمنا ويرحم اخوتنا واخونا كلهم
وياريت يبقى عندنا وعي كامل للي ممكن يجي من وراه
ومش ننساق ورى التكنولوجيا من غير اي تفكير
تحياتي لك حبيبتي

Darsh Basha said...

ربنا يسترها علينا يارب
بس دى اخر الشات
الباة نضيفة والنهاية سودا
موضوع رائع

hasona said...

السلام عليكم
ومن النت ما قتل
علي قدر ما فيه فايدة
أصبح يقع بسببه الكثير من المصائب والمشاكل

أصبح ككل شئ - ممكن تستخدمه في الخير وممكن نستخدمه في الشر

الله يعافينا
الكثير يستخدمه في الشر وفي المعصية

،،،،
المفروض أن نراقب أولادنا وزوجاتنا جيدا
ونعلمه كل فترة ونزيد في الجرعة الايمانية الممزوجة بحب ومراقبة الله

لابد ان نسد كل باب للخطيئة و نغلق طريق الشيطان لتزين المعصية

،،،،،
رجالة أخر زمن

gogo!sf said...

ماما امولة

اولا بكون سعيده جدا بوجودك

اما بالنسبه للمثل ده انا
عارفه قصته ؟؟؟

زى ما تقولى كده كما تدين تدان
سواء فى الخير او لقدر الله فى الشر

ومنك نستفيد يا ماما

نورتينى جدا

gogo!sf said...

اسافو ازيك

انت معاك حق طبعا ...بس الراجل عليه الغلط الاكبر لانه اتصرف غلط كان ممكن جدا يقعد معاها وهى بتكلم اصدقائها وبكده كان يتأكد اذا كان اصدقائها فعلا ولا لاء لكن هو افترض الاسوء والشك عماه والشيطان طبعا اتدخل وخلاه اتصرف غلط من الاول الى الاخر

وبعدين يا اسافو فين الراجل اللى يعرف ان مراته راحت شقه واحد غريب ويكون عنده فرصه للتفاهم معاها الطبيعى جدا انه يقتلها مش يطلقها

دايما منورنى

gogo!sf said...

سمكه واحده

بصى يا سمكه التكنولوجيا عمرها ما كانت سيئه خالص بالعكس طبعا بس مع الاسف الناس اللى بتستخدم كل حاجه بطريقه غلط وعشان كده كتيييير اوى بيروحو فى الرجلين وحتى الشات مش عيب لما تكونى بتتكلمى مع اصدقائك او قريبك او حتى جيرانك بس يكونو كلهم من جنسك بنات يعنى انتى فهمه ولا لاء انتى حرة انا بنبهك اهو ( وش مكشر ) وبيتخانق

بس سيبك انتى فيزور تحفه رغم انى بعشق البطاطس اللى فى الفرن بالفراخ ومعاها بقى طبق سلطه اوعى متقوليش
ايه يا بنتى ده انا ميتانا من الجوع ولا ايه؟؟؟؟

سلام يا جميل
منورانى يا قمر

gogo!sf said...

سمكه واحده

يا حبيبة قلبى مش لوحدك اللى ممققه عينك ادام الشاشه كلنا فى الهوا سوا وفعلا بشوف بلاوووووى مش ممكن تتخيلى كميه الحزن اللى بكون فيها لما بقرا حاجه كده ولا كده ربنا يلطف بينا يا سمكه ويهدينا ويبعد عنا الشر يارب

وطبعا احلى حاجه انى اتعرفت عليكى وعلى كل الناس المحترمين دول اللى فى عالم التدوين

وسبتنى يا قمر

سألتك حبيبى على وين رايحين

gogo!sf said...

اسماء واحلام فى وجدانى

محمد رسول الله

لا تعليق طبعا
بعد احلى كلمه رديت بيها على البوست

منور يا احمد

gogo!sf said...

اسماء واحلام فى وجدانى

لاء يا احمد انت بتتهمنى كتير اوى
انت اللى ماكتبتش تعليقات غير الموجود ادامك اهى
ماشى يا احمد كل ده عشان الزمالك اتعادل فى الشوط الاول
الاهو كسب ولا فضل متعادل اصل انا بصراحه ماتفرجتش على المطش خالص
وبعدين ابقى حصن التعليق بعد لما تكتبه ماشى

طبعا انا محذفتش حاجه هو ممكن يكون اتكتب بس ما اتنشرش عادى بتحصل معايا
منور يا احمد

gogo!sf said...

من غير عنوان

طبعا هو غلطان انه اداها الفرصه تعمل كده وخصوصا انه فاهمها كويس جدا فأكيد عرف يوصلها بسهوله

وهى كمان غلطانه جدا جدا
ازاى تكون متزوجه وتعمل كده

ارحمنا يارب برحمتك

على فكرة بقى عمر الراجل ميستمر مع مراته طول مافى شك ده الراجل الصح شاكك يا اما تواجه ربما يكون شكك غلط يا اما تطلق فورا

ويمكن يكون فكرى غلط
هى وجهات نظر مش اكتر

نورتنى جدا

gogo!sf said...

اللؤلؤة

عندك حق طبعا بس مش كل الناس بتستعملها غلط

وصح جدا

البادى اظلم وهو اللى بدا
لازم يكون جزائه خراب البيت
ربنا يسترها علينا

بشكرك على الزياره
نورتنى جدا

gogo!sf said...

mm

والله عندك حق الستات دول مظاليم على الاخر ديما مجتمعنا بيحاسب الست على اخطائها وعلى اخطاء الراجل كمان

بس بينى وبينك هى عايزة قطع رقابتها
ازاى تسمح لنفسها توصل دليفرى لراجل فى شقته وتقريبا كده كان الوقت متأخر

استغفر الله العظيم
استرها يارب

دايما منورانى

gogo!sf said...

انت تسأل والكمبيوتر يجيب

جارى التنفيذ

دعوة عزيزة يا افندم

gogo!sf said...

عمرو

طبعا كان عارف انها زوجته وهو كان متعمد يعمل كده عشان عايز يعرف اذا كانت فعل بتكلم اصدقائها زى ما قالت ولا لاء بس هو اتصرف غلط لانه ممكن يكونو فعلا اصحابها وهى مش بتكذب عليه وخصوصا انها بتحبو واللى خلاها عملت ده انشغاله عنها بانه يجر رجلها للموقف ده بس ده مش مبرر للى عملته طبعا انا بس بحلل الموقف من وجهة نظرى مش اكتر

وبصرف النظر عن البوست والموضوع
يعنى ايه سلوكها الحلزونى ثلاثى الابعاد

بتشرف بوجودك جدا

gogo!sf said...

نور

بصى يا قمر الراجل هو اللى عليه الغلط الاكبر مش هيا صدقنى والله اعلم لو ماكنش اتصرف كده يمكن تكون فضلت زى ماهى بتشت وبس ويمكن كمان يكون مش بتشت غير مع بنات الله اعلم بيها وخصوصا انه مذكرش رد فعلها ولا حتى حوار عنها بعد الموقف وقليل ان ماكانت جاتلها ساكته قلبيه وراحت فيها ربنا يرحمها ويرحمنا

نورتينى يا جميل

gogo!sf said...

الشاعر محمد عبد الرحمن

اسوء حاجه فى الشات اللى بيشت مع ناس غير معروفه مش يعنى اصحابه او قرايبه

وفعلا انا بردو سمعت كتييييير اتجوزو عن طريق الشات مايكنش الشات ده بقى خطبه واحنا منعرفش

نورتنى يا محمد

gogo!sf said...

رومانسى

لاء هو اتشغل عنها لما بقى يلاقى ناس كتير على ايميلها ولما يسألها تقولو اصحابى فطبعا بقى مركز معاها جدا وفكر فى اللى عمله
وبالنسبه ليها مافيش حاجه اتذكرت عن رد فعلها للموقف
وبردو مش مبرر انها تعمل كده عشان جوزها انشغل عنها شويه
اومال هيقعد يحب فيها وبس هياكلو ويشربو حب مع انى اعرف ناس بياكلو ويشربو حب وعيشين كويس جدا

ربنا يجعلنا دايما من الافاضل
نورت بعد الغيبه

gogo!sf said...

momken

ازيك يا ممكن بعد قراراتك الخطيرة

اه بجد لسه فى شات اهو بنسمع عنه

بس انا مش معاك يا ممكن فى تصرف الراجل لانه غلطان جدا فى كل تصرفاته من الاول للاخر فين بقى الرجوله والنخوة عشان يعمل كده يوصل مراته انها تروح شقه راجل غريب ازاى طيب
ده حتى ربنا هيحسبو على عملتو السوده لانه ممكن جدا يكون ظلمها والله اعلم بردو الواحد مسمعش عنها حاجه بعد الموقف ده ممكن جدا تكون ماتت بجد مهو موقف صعب جدا جدا
ربنا يسترها علينا جميعا

شرفتنى ونورتنى جدا

gogo!sf said...

yoyo

يا بنتى مانا بقولك راجل راجل

فعلا عنده برود اعصاب مش عند حد

وصح والله عندك حق هو اللى هيأ لها

الوضع عشان تغلط لانه اهمالها فى البيت

وانشغل بيها من ناحيه تانيه وهو فى

شغله يعنى هو اللى غلطان اكتر منها

وده مش مبرر ليها انها صح لاء طبعا هى

عايزة قطع رقباتها

ربنا يسترها علينا

منورانى يا قمر

gogo!sf said...

الازهرى

والله يا ازهرى عندى احساس انها ممكن تكون مبتكلمش حد على الشات غير اصحابها وبس لانها بكل بساطه لو كان فى حد غير الزوج الفاضل كانت انشغلت بيهم هما كمان وبالتالى كان عجبها الموضوع عن طريق الشات وبس

وبردو مش هقول غير الله اعلم بيهم

نورتنى جدا

gogo!sf said...

اسماء واحلام فى وجدانى

اى خدمه يا احمد

هخليك حاضر فى خط الوسط

وهنيالك يا فاعل الخير والسواب

يحنن يا احمد

gogo!sf said...

تامر على

طبعا يا تامر هو قليل العقل ويمكن اصلا يكون معندوش عقل خالص

بس الواحد ميعرفش الحقيقه فين هو غلطان انه جر رجلها للغلط
وهى تستاهل اللى يجرالها لو فعلا عملت كده وراحت له الشقه يستمرو او ميستمروش هما ادرا بما فعلوه

وربنا يستر على الجميع

منورنى دايما يا تامر

gogo!sf said...

حنان سعيد

اه والله هو فعلا الشات ده كارثه
ومصيبه كمان وللاسف ان الكل بيقول
كده انت بتتكلم مع اشخاص لا شايفهم
ولا سامعهم يعنى عادى جدا اهو بضيع وقت
وخلاص... بس صدقينى الشات ده مش صح اطلاقا
ربنا يسترها على الجميع

دايما منورانى يا قمر

gogo!sf said...

mosooz

يارب يسترها

فعلا اخرت الشات سوده ومهببه كمان

ربنا يوسع وعى وفكر الناس

نورتنى جدا

gogo!sf said...

hasona

مش الكل بيستخدمه فى الشر بس نقدر نقول بقى جزء كبير اوى اللى بيستعملو غلط ربنا يهدى ويبعدى عنا الشر


كلامك طبعا صح بس طول مافى تربيه صح واهتمام بالزوجه مش هيكون فى اخطاء خالص هيراعو ربنا زى ما الراجل بيراعى ربنا فى اهل بيته

شرفتنى وزيارة عزيزة جدا

maha zein said...

يا خراشتي
يا حوستي
يا حلولي
يا هشاكة
يا بشاكة
ده بجد ده ولا كدة وكدة
ايه ده يا ناس
ده كان كالها بوكس وناولها مقلب حرامية واداها شلوط
وناولها روسية
كان خلاها متنفعش غيره ولا تنفع

والله شكله راجل محترم
دي ستات فاضية وعينها فارغة
بلا قلة حيا

فشكووول said...

جوجو العزيزه
ازيك وحشتينى
انا والله بعتذر عن تأخرى فى الزياره
بس سؤال يعنى
هو الراجل كان يقصد يوقع مراته عشان يمسك عليها غلطه ولا جات كدا
اذا كان يقصد يبقى هو الغلطان عشان المشاعر لو حد حب يفتحها بتتفتح له واللعب بالمشاعر هو بالظبط زى اللعب بالنار
بس لو كان ما يقصدش تبقى هى مع السلامه وكمان هو مع السلامه عشان كدا الاثنين يبقوا خاينين لبعض
وعلى فكره الشات ما لوش اى لازمه الا بين راجل وراجل او ست وست لانه كما قلنا المشاعر من السهل اللعب بها وفيها
واذا اجتمع رجل وامرأه الا وكان الشيطان ثالثهما
وتحياتى

gogo!sf said...

مها زين

يا واد يا جامد
مقلب حراميه يا مها
حسبى الله احنا يا بنتى دخلين معركه والله بتهرجى وبعدين ده محترم فى ايه

يعنى يراسل مراته متعمد ويعمل كل الحيل عشان يوقعها وتقوليلى محترم

فين ده الاحترام وبعدين قعد ست شهور يعنى لو هى كانت كده مش بعتقد انها تاخد كل الوقت ده كان الوقت اختصر اكتر من كده

والله اعلم انا مش ببرر لها
هى طبعا كانت عيزة شلوط وكام بوكس كده على الماشى عشان مها متزعلش


مش تغيبى تانى عشان ما نولكيش انا بوكسين انتى حر يا جميل

نورتينى

gogo!sf said...

فشكول

تخيل اه والله كان قاصد مهو شك فيها لما لاقاها مسيفه ناس على الميل فحب يعمل فتك بس على ما اعتقد انها لو هى كده مش هتكون محتاجه ده لشخص هى متعرفتش عليه مباشر من ع الشات المهبب ده
والله اعلم بيهم

وتصدق عندك حق طبعا

اذا اجتمع راجل وامرأه الا وكان الكمبيوتر ثالثهما

متتأخرش تانى انا بحذرك

دايما بكون سعيده بوجود حضرتك

دايما منورنى

انت تسال والكمبيوتر يجيب said...

الأخت العزيزه
نفكر فى طرح الموضوع فى برنامجنا الأذاعى بعد سماع آراء زوار مدونة البيرنامج
ويسعدنا ان تشاركى بالراى حيث انك عرضت المشكله بطريقه بسيطه وشيقه
مدونتنا
http://netonradio.blogspot.com